ఈమధ్య డబ్బింగ్ చిత్రాలకు కాస్త ఊపు వచ్చినట్టు కనిపిస్తోంది. `విక్రమ్` తెలుగులోనూ సూపర్ హిట్టయ్యింది.`పి.ఎస్ 1`కి మంచి ఓపెనింగ్స్ వచ్చాయి. ఇప్పుడు అందరి కళ్లూ `కాంతారా` పై పడ్డాయి. రిషబ్ శెట్టి నటించి దర్శకత్వం వహించిన కన్నడ సినిమా ఇది. అక్కడ సూపర్ హిట్టయ్యింది. కన్నడ విమర్శకులు దీన్ని ఓ క్లాసిక్ గా అభివర్ఱించారు. దాంతో మిగిలిన భాషల్లో ఈ సినిమాని డబ్ చేయాలన్న డిమాండ్ పెరిగింది. ఈమధ్య ఏ సినిమా అయినా అన్ని భాషల్లోనూ నేరుగా ఒకేసారి విడుదల చేస్తున్నారు.కానీ `కాంతారా`కే `మా భాషలో దీన్ని డబ్ చేయండి` అంటూ అడిగి మరీ చేయించుకొంటున్నారు. తెలుగులో ఈ సినిమాని గీతా ఆర్ట్స్ విడుదల చేస్తోంది. ఈ శుక్రవారమే విడుదల అవుతోంది. తెలుగులో ఈ సినిమా చూడాలని చాలామంది ఎదురు చూస్తున్నారు. టాక్ ఎలాగూ బయటకు వచ్చేసింది కాబట్టి.. వసూళ్లు బాగానే ఉండే అవకాశాలున్నాయి. రిషబ్ శెట్టికి తెలుగులో మార్కెట్ లేదు. చాలామందికి రిషబ్ ఎవరో తెలీదు. తను నటించిన `బెల్ బోటెమ్` ఆహాలో వచ్చింది కానీ.. థియేటర్లో విడుదల కాలేదు. అదొక్కటే ఈ సినిమాకి మైనస్. కాకపోతే ఈవారం తెలుగులో పెద్దగా సినిమాలేం రావడం లేదు. దీపావళికి మాత్రం జోరుగా సినిమాలొస్తున్నాయి. ఈ గ్యాప్ని `కాంతారా` క్యాష్ చేసుకొనే అవకాశం ఉంది.
అందరి కళ్లూ.. ‘కాంతారా’ వైపే!
