తెలంగాణ రాష్ట్ర సమితి క్యాడర్కు ప్రతీ రోజూ నిరసనలు.. ధర్నాలు తప్పడం లేదు. అధికార పార్టీగా ఉంటూ ప్రతిపక్ష పార్టీల తరహాలో పోరాడాల్సి వస్తోంది. బీజేపీ నేతలు ఎలాంటి ప్రకటనలు చేసినా అందులో ఏదో ఓ అర్థం వెదుక్కుని నిరసనలు చేపట్టాలని ..హైకమాండ్ సూచిస్తూండటం.. తూ.చ తప్పకుండా పాటించేందుకు నేతలు ఒత్తిడి చేయడంతో కింది స్థాయి క్యాడర్ ఖర్చు పెట్టుకుని ధర్నాలు చేయక తప్పడం లేదు. బీజేపీతో కేసీఆర్ ధాన్యం కొనుగోలు విషయంలో పంచాయతీ పెట్టుకున్న దగ్గర్నుంచి టీఆర్ఎస్ క్యాడర్ కు తీరిక లేకుండా పోయింది. అధికార పార్టీలో ఉన్నామన్న సంగతిని వారు మర్చిపోవాల్సి వచ్చింది.
కొత్తగా బయ్యారంలో ఉక్కు ఫ్యాక్టరీ నిర్మాణం సాధ్యం కాదని కిషన్ రెడ్డి ప్రకటించారు. విభజన చట్టంలో పరిశీలించాలని ఉంది. అక్కడ ఉక్కు ఫ్యాక్టరీ సాధ్యం కాదని గతంలోనే ఓ క్లారిటీ వచ్చింది. ఈ కారణంగా ప్రజల్లో పెద్దగా భావోద్వేగం కూడా లేదు. అయినా సరే కిషన్ రెడ్డి వ్యాఖ్యలను తప్పు పట్టి .. ధర్నాలు నిర్వహించాలని ఆదేశాలు వెళ్లాయి. దీంతో క్యాడర్ మరోసారి రోడ్లపైకి వచ్చింది. అయితే భావోద్వేగం లేని అంశం.. పదే పదే ధర్నాలు చేయాల్సి రావడంతో కమ్యూనిస్టుల తరహాలో వారంతా మొక్కుబడి ధర్నాలు చేసి .. మీడియాలో కవరేజీ చూసుకుని ఎవరి దారిన వాళ్లు వెళ్లిపోయారు.
గతంలో ఏపీలో టీడీపీ నేతలకూ ఇలాంటి పరిస్థితి ఉండేది. చివరి ఏడాది మొత్తం అధికార పార్టీ అనే సంగతిని మర్చిపోయి బీజేపీపై పోరాటానికి రోడ్డెక్కాల్సి వచ్చింది. కానీ వారికి చివరికి ఎలాంటి ప్రయోజనమూ లభించలేదు. ఇప్పుడు టీఆర్ఎస్ క్యాడర్కూ అదే పరిస్థితి వచ్చింది. ఇంకా ఏడాదిపైనే ఎన్నికలకు సమయం ఉంది. ఇప్పుడే ఇలా ఉంటే ముందు ముందు ఎలాంటి పరిస్థితి ఉంటుందన్నది టీఆర్ఎస్ ద్వితీయ శ్రేణి నేతలకు టెన్షన్ గా మారింది. కొసమెరుపేమిటంటే.. ఇప్పుడే యుద్ధాలు అవసరం లేదని కేటీఆర్ చెబుతూ ఉంటారు. కానీ వాస్తవగా మాత్రం జరుగుతోంది వేరు.
