శర్వానంద్ కు ‘ఒకే ఒక జీవితం’తో ఒక ఎమోషనల్ హిట్ ఇచ్చాడు దర్శకుడు శ్రీకార్తిక్. ఈ సినిమా కమర్షియల్ గా ఎంత సక్సెస్ అయ్యిందనే మాట పక్కన పెడితే మంచి సినిమాగా కితాబందుకుంది. దర్శకుడు శ్రీకార్తిక్ కి మంచి మార్పులు పడ్డాయి. ఒక ఎమోషనల్ జర్నీని సైన్స్ ఫిక్షన్ లో బ్లండ్ చేయడం అందరికీ నచ్చింది. అయితే ఇప్పుడు శ్రీకార్తిక్ గురి ఒక పెద్ద సినిమా మీదకు వెళ్ళింది. తన రెండో సినిమాని అల్లు అర్జున్ తో చేయాలని ప్లాన్ చేస్తున్నాడు కార్తిక్. ఈ విషయాన్ని ఆయనే స్వయంగా చెప్పాడు.
”నా కొత్త సినిమా తెలుగులో ఉండబోతుంది. పెద్ద స్కేల్ లో థియేటర్ ఎక్స్ పీరియన్స్ ఇచ్చే సినిమా చేయాలనే ఆలోచన వుంది. ఒక ఫాంటసీ స్క్రిప్ట్ వుంది. రియలిజం ఫాంటసీ లో క్రేజీగా వుంటుంది. నా రెండో సినిమా అల్లు అర్జున్ గారితో చేయాలనీ వుంది. ఆయనకి వెళ్లి కథ చెప్పాలి. చెన్నైలో తెలుగు సినిమా అంటే అల్లు అర్జున్ సినిమానే. మా ఫ్యామిలీలో అంతా అల్లు అర్జున్ అభిమానులమే. ఆయనతో సినిమా కోసం ఐదేళ్ళు వెయిట్ చేయడానికి కూడా ఓకే” అని చెప్పుకొచ్చాడు శ్రీకార్తిక్.
