నాగచైతన్య – సమంత విడిపోయారు. వాళ్లిద్దరికీ విడాకులు వచ్చి చాలా కాలమైంది. కానీ ఆ వార్త మాత్రం పాతబడడం లేదు. ఈ విషయం ఇప్పటికీ హాట్ టాపిక్కే. అసలు వీరిద్దరూ ఎందుకు విడిపోయారు? కారణాలేంటి? అనే విషయాలు ఇప్పటి వరకూ బయటకు రాలేదు. `పరస్పర అంగీకారంతోనే..` అంటూ రొటీన్ డైలాగులు బయటకు వచ్చాయి తప్ప, అసలు కారణం తెలీదు. ఈ విషయమై నాగచైతన్య, సమంత ఎప్పుడూ మాట్లాడలేదు. సమంత అయినా అప్పుడప్పుడూ నర్మగర్భంగా కామెంట్లు పెట్టేది. చైతూ అసలు సమంత ఊసే తీయలేదు. మీడియా ముందుకు వచ్చేటప్పుడు కూడా `నో పర్సనల్ క్వశ్చన్స్` అంటూ ముందే షరతు పెట్టేవాడు. దాంతో సమంత విషయంలో చై మాట్లాడడానికి ఇష్టపడడం లేదన్న సంకేతాలు అందాయి.
అయితే ఇప్పుడు సమంత పూర్తిగా ఓపెన్ అయిపోయింది. కాఫీ విత్ కరణ్లో.. విడాకుల గురించి మాట్లాడింది. చై…తో తన బంధం అంత అన్యోన్యంగా సాగలేదని సంచలన కామెంట్లు చేసింది. “మా ఇద్దరి మధ్య మంచి అనుబంధం లేదు. ఇద్దరినీ ఒకే గదిలో ఉంచితే అక్కడ ఎలాంటి పదునైన ఆయుధాలు, వస్తువులు లేకుండా చూసుకోవాలి“ అని చెప్పడం ద్వారా చై – సమంతల బంధం ఎలాంటిదో అర్థం చేసుకోవొచ్చు. విడాకులు తీసుకొనేటప్పుడు తాను చాలా మనోవేదనకు గురయ్యానని, తనకు రూ.250 కోట్ల భరణం ఇచ్చింది కూడా నిజం కాదని క్లారిటీ ఇచ్చేసింది. దాంతో ఈ విడాకుల వ్యవహారంలో తనపై సానుభూతి షిఫ్ట్ అయ్యేలా చూసుకోగలిగింది.
సమంత ఎలాగూ ఓపెన్ అయిపోయింది కాబట్టి… ఇప్పుడు నాగచైతన్య వంతు రావాలి. ఎందుకంటే.. వాదన ఎప్పుడూ ఒకసైడే వినిపించడం కరెక్ట్ కాదు. సమంత అలా చెప్పుకొంటూ పోతే… చై ఇమేజ్ డామేజ్ అవుతుందని, తప్పంతా తనదే అని ఒప్పుకొన్నట్టు అవుతుంది. కాబట్టి.. ఈసారి.. చై కూడా కాస్తో కూస్తో స్పందించే అవకాశం ఉంది. ‘థ్యాంక్యూ’ ఇంటర్వ్యూలలో సమంత ప్రశ్నని అడక్కుండా చూసుకొన్న చై.. ‘లాల్ సింగ్ చద్దా’ ప్రమోషన్లలో మాత్రం కచ్చితంగా సమంతకు కౌంటర్ ఇస్తాడనే అనిపిస్తోంది. మరి ఏమవుతుందో చూడాలి.
