కేంద్ర బడ్జెట్పై తెలుగు రాష్ట్రాల పార్టీల స్పందనతో ఆ పార్టీ విధానం తెలిసిపోతోంది. కేంద్ర బడ్జెట్పై కేసీఆర్ తీవ్రంగా విరుచుపడ్డారు. మొదట పనికి మాలిన, పసలేని, గోల్ మాల్ బడ్జెట్ అంటూ ప్రెస్నోట్ రిలీజ్ చేశారు. తర్వాత ఆ డోస్ సరిపోలేదని స్వయంగా ప్రెస్ మీట్ పెట్టారు. తనదైన శైలిలో గంటన్నర సేపు బడ్జెట్ను చీల్చిచెండాడారు. ప్రభుత్వంపైన.. మోడీ పైన తీవ్రమైన విమర్శలు చేశారు. బడ్జెట్కు సంబంధం లేని అంశాలను తెచ్చి మోడీపై విమర్శలు చేశారు. హైదరాబాద్లో ఏర్పాటయిన ఆర్బిట్రేషన్ సెంటర్ను మోడీ గుజరాత్ తరలించుకుపోవాలనుకున్నారని ఆరోపించారు. అన్ని రకాలుగా విమర్శించి.. బడ్జెట్లో గోల్ మాల్ తప్ప ఏమీ లేదని..దేశాన్ని నాశనం చేస్తున్నారని మండిపడ్డారు. ఇటీవలి కాలంలో కేసీఆర్ బీజేపీపై యుద్ధమే అన్న ఫార్ములా ఫాలో అవుతున్నారు కాబట్టి కేసీఆర్ ఘాటు స్పందనను చాలా మంది ఎక్స్పెక్ట్ చేశారు.
ఏపీ సీఎం జగన్ బడ్జెట్పై స్పందించలేదు. ఆయనకు అలాంటి అలవాటు లేదు. ప్రతిపక్ష నేత చంద్రబాబుకు స్పందించకుండా ఉండే అలవాటు లేదు. ఈ ప్రకారం ఆయన స్పందించారు. అయితే కేసీఆర్ స్టైల్లో కాకుండా విమర్శించడానికి మొహమాట పడ్డారు. బడ్జెట్ ఆశాజనకంగా లేదని రైతులు, పేదలు.. కొవిడ్తో దెబ్బతిన్న రంగాలకు ఎలాంటి చేయూతనిస్తారో కూడా బడ్జెట్లో చెప్పలేదన్నారు. ఆహార సబ్సిడీని తగ్గించి పేదలపై భారం మోపుతున్నారని విమర్శించారు. రాష్ట్ర ప్రయోజనాలను కాపాడటంలో వైఎస్ఆర్సీపీ విఫలమయిందని అసంతృప్తి వ్యక్తం చేశారు. 28 మంది ఎంపీలు ఉండి ఏం సాధించారని.. . ప్రాజెక్టులు, నిధుల కేటాయింపుల విషయంలో కేంద్రంపై ఒత్తిడి తేవడంలో.. సీఎం జగన్ పూర్తిగా విఫలమయ్యారని విమర్శించారు. వీలైనంత పొలైట్గా బడ్జెట్ను ఖండించేందుకు చంద్రబాబు ప్రయత్నించారు.
సీఎం జగన్ స్పందించలేదు కానీ… ఢిల్లీలో విజయసాయిరెడ్డి మాత్రం స్పందించారు. ఈ బడ్జెట్ చాలా నిరుత్సాహ పరిచిందని ఎప్పట్లాగే చెప్పిన ఆయన .. అప్పుల విషయంలో మాత్రం కేంద్రంపై కాస్త అసంతృప్తి వ్యక్తం చేశారు. అప్పులు తీసుకునే విషయంలో కేంద్ర ప్రభుత్వ వైఖరిని ప్రశ్నించారు. ఎఫ్ఆర్బీఎం చట్టానికి లోబడే రాష్ట్రాలు అప్పులు తీసుకోవాలని కేంద్రం నిబంధన పెట్టిందని కాంగ్రెస్ కేంద్రం మాత్రం అదే పనిగా అప్పులు చేస్తోందని.. ఎఫ్ఆర్బీఏం చట్టాన్ని ఉల్లంఘిస్తోందని అన్నారు. ఇది ద్వంద్వ ప్రమాణాలను పాటించడమేనని స్పష్టం చేశారు. రాష్ట్రానికి కూడా ఎఫ్ఆర్బీఎం చట్టానికి మించి రుణాలు తీసుకునేందుకు పర్మిషన్ ఇవ్వాలని అన్నారు.
