చంద్రబాబు నాయుడు సతీమణి, ఎన్టీఆర్ కుమార్తె అయిన నారా భువనేశ్వరిపై వైసీపీ ఎమ్మెల్యేలు, మంత్రులు అసెంబ్లీ వేదికగా బయట చేసిన వ్యాఖ్యలు కలకలం రేపుతున్నాయి. రాజకీయంగా దుమారం రేపుతున్నాయి. కారణం ఏదైనా వివాదాన్ని ముగించడానికి వల్లభనేని వంశీతో క్షమాపణలు చెప్పించారు. వైసీపీ ఎమ్మెల్యేలు కూడా కన్నీళ్లతో భువనేశ్వరి కాళ్లు కడుగుతామనే మాటలు చెప్పడం ప్రారంభించారు. అదే సమయంలో మల్లాదివాసు అనే టీఆర్ఎస్ కార్పొరేటర్ కులం కోణంలో .. భువనేశ్వరిపై అనుచిత వ్యాఖ్యలు చేసిన వారిని అంతమొందిస్తే రూ.50 లక్షలు ఇస్తామని ప్రకటించారు.
ఇది కూడా తీవ్ర వివాదానికి కారణం అయింది.తన వ్యాఖ్యలను వక్రీకరించారని ఆయన తర్వాత సర్దుబాటు చేసుకున్నా.. ఆయనపై వైసీపీ నేతలు తీవ్ర బెదిరింపులకు పాల్పడినా… ఆ వ్యవహారం మాత్రం అంతకంతకూ పెరుగుతూనే ఉంది. తాజాగా అనంతపురం జిల్లాలో మల్లాది వాసుకు మద్దతుగా అనంతపురంలో భారీ ఎత్తున ఫ్లెక్సీలు వెలిశాయి. మల్లాది వాసుకు అభినందనలు తెలిపారు. ఎందుకంటే … ” రూ.50 లక్షల ఆఫర్”ను ప్రకటించినందుకు.
ఈ వ్యవహారం ఏమాత్రం తగ్గేది కాదని ఈ ఫ్లెక్సీలు చూసిన తర్వాత చాలా మందికి అర్థం అవుతోంది. వైసీపీ నేతలకు కూడా తాము చిన్న తప్పు చేయలేదని.. అర్థమైందని అందుకే ముగించాలని అనుకుంటున్నారని భావిస్తున్నారు. ఈ వ్యవహారం ఎక్కడి వరకూ వెళ్తుందో కానీ..ముగింపు అయితే ఇప్పుడల్లా వచ్చే అవకాశం కనిపించడం లేదని భావిస్తున్నారు.
