గ్రామీణ విద్యుదీకరణ సంస్థ, పవర్ ఫైనాన్స్ కార్పొరేషన్ నుంచి ప్రభుత్వం తీసుకున్న రుణాల కిస్తీలు చెల్లించకపోవడంతో వాటి గురించి మాట్లాడటానికి ఆయా సంస్థల సీఎండీలు ఏపీకి వచ్చారు. వారు అప్పుల సెటిల్మెంట్ గురించి రాష్ట్ర ప్రభుత్వంతో ఒప్పందం చేసుకునే అవకాశం ఉంది. ఈ రోజంతా వారు ఉన్నతాధికారులతో చర్చల్లో ఉంటారు. మధ్యాహ్నం సీఎస్తో కూడా సమావేశం అవుతారు. సీఎం జగన్తో కూడా భేటీ ఉంటుందన్న చర్చ జరుగుతుంది. అయితే ఏపీ అధికారులు చెప్పే సమాధానంతో వారు సంతృప్తి చెందితే ముఖ్యమంత్రితో భేటీ అయ్యే అవకాశం ఉంటుంది లేకపోతే ఉండదని అంటున్నారు.
ఏపీ జెన్కోకు రూరల్ ఎలక్ట్రిఫికేషన్ కార్పొరేషన్, పవర్ ఫైనాన్స్ కార్పొరేషన్ పెద్ద ఎత్తున రుణాలిచ్చాయి. వాటికి కొంత మంది ఎప్పటికప్పుడు తిరిగి చెల్లిస్తూ ఉండాలి. కానీ చెల్లించడం లేదు. ఎన్ని సార్లు లేఖలు రాసినా ప్రయోజనం లేకపోయింది. దీంతో జెన్కోను డిఫాల్టర్ జాబితాలో చేర్చారు. అధికారికంగా ప్రకటించే ముందు చివరి సెటిల్మెంట్ కోసం ప్రయత్నించాలని ఏపీకి ఉన్నతాధికారులు వచ్చినట్లుగా తెలుస్తోంది. వీరు వచ్చిన కారణమో.. మరొకటో కానీ ఏపీ కేబినెట్ సమావేశాన్ని రాత్రికి రాత్రి వాయిదా వేశారు.
17వ తేదీన కేబినెట్ భేటీ ఉంటుందని అన్ని శాఖల వద్ద ప్రతిపాదనలు తీసుకుని రెడీ చేశారు. అయితే పదహారో తేదీ రాత్రి సీఎస్ సమీర్ శర్మ పేరుతో ప్రకటన విడుదలయింది. ముందుగా నిర్ణయించి.. ఎజెండా ఖరారు చేసి.. మంత్రులకు సమాచారం ఇచ్చి..అధికారులు అన్ని విధాలుగా సిద్ధమైన తర్వాత కేబినెట్ భేటీని వాయిదా వేయడానికి బలమైన కారణం ఉండాలి. కానీ ఏ కారణం కనిపించడం లేదు. దీంతో అప్పుల వసూలుకు వచ్చిన కేంద్రం ఉన్నతాధికారులకు ఇతర అధికారులు అందుబాటులో ఉండటానికే వాయిదా వేశారన్న అభిప్రాయం అధికారవర్గాల్లో ఏర్పడింది.
