గోపీచంద్, నయనతార జంటగా నటించిన చిత్రం ‘ఆరడుగుల బుల్లెట్’. బి.గోపాల్ దర్శకత్వం. దశాబ్ధం కింద రావాల్సిన సినిమా ఇది. ఆర్ధిక, నిర్మాణ ఇలా అనేక చిక్కుల్లో పడి ఆగిపోయింది. అయితే ఎట్టకేలకు సినిమాకి మోక్షం దొరికింది. అన్నీ సమస్యలని దాటుకొని అక్టోబర్ 8 థియేటర్ లోకి వస్తుంది. ఈ నేపధ్యంలో సినిమా ట్రైలర్ వదిలారు.
ట్రైలర్ లో మెరుపులు కనిపించాయి. అయితే పదేళ్ళ క్రితం మెరిసిన మెరపులివి. అల్లరి చిల్లరిగా తిరిగే ఓ కుర్రాడు. ప్రేమలో పడటం. విలన్ ఎంట్రీ. విలన్ వల్ల తన కుటుంబానికి ఆపద రావడం. ఆ విలన్ ని హీరో ఇరగదీయడం.. ఇదే ‘ఆరడుగుల బుల్లెట్’ కహాని అని ట్రైలర్ చూస్తే అర్ధం అవుతుంది. పదేళ్ళ క్రితం ఇలాంటి ఫార్ములలో కొన్ని సినిమాలు వచ్చాయి. అప్పటి ట్రెండ్ కి తగ్గుట్టు ఈ కధని రాసుకొనివుంటారనిపిస్తుంది.
ట్రైలర్ లో యాక్షన్ సీన్లు దట్టించారు. బి గోపాల్ మార్క్ కత్తులు, వ్యాన్ లు గాల్లో ఎగరడాలు అన్నీ వున్నాయి. డైలాగ్స్ లో కూడా పాత వాసన కొట్టాయి. పదేళ్ళ ముందు సినిమా కాబట్టి గోపి చంద్, నాయనతార కొంచెం యంగ్ గానే కనిపించారు. గోపిచంద్ తో పాటు నయనతార బి. గోపాల్ డైరెక్షన్, వక్కంతం వంశీ కథ, మణిశర్మ మ్యూజిక్ సినిమాకి ఆకర్షణ. ట్రైలర్ లో పక్కా కమర్షియల్ హంగులు అయితే కనిపిస్తున్నాయి. మరి ఈ బుల్లెట్ థియేటర్ లో ఎలాంటి సౌండ్ చేస్తుందో చూడాలి.
