ఈమధ్య టాలీవుడ్ పై గ‌ట్టిగా ఫోక‌స్ పెట్టాడు ధ‌నుష్‌. తెలుగులో నేరుగా ఓ సినిమా చేస్తున్నాడు. శేఖ‌ర్ క‌మ్ముల ద‌ర్శ‌కుడు. ఆ సినిమాకి సంబంధించిన అధికారిక ప్ర‌క‌ట‌న వ‌చ్చిందో.. లేదో మ‌రో సినిమాకి అడ్వాన్స్ కూడా తీసేసుకున్నాడు. సితార ఎంట‌ర్‌టైన్‌మెంట్స్ సంస్థ‌తో ధ‌నుష్ ఓ సినిమా చేయ‌డానికి ఓకే చెప్పేశాడు. తొలిప్రేమ‌, రంగ్ దే చిత్రాల ద‌ర్శ‌కుడు వెంకీ అట్లూరి ధ‌నుష్ కోసం ఓ క‌థ త‌యారుచేశాడు. ఇటీవ‌ల ధ‌నుష్ తో వెంకీ అట్లూరి ములాఖాత్ జ‌రిగింది. క‌థ కూడా ఓకే అయిపోయింది.

వెంకీ అట్లూరి ఇప్ప‌టి వ‌ర‌కూ చేసిన సినిమాల‌న్నీ ప్రేమ‌క‌థ‌లే. అయితే.. ధ‌నుష్ కోసం మ‌రో కొత్త క‌థ‌ని ఎంచుకున్నాడ‌ట‌. ఈసారి విద్యావ్య‌వ‌స్థ నేప‌థ్యంలో క‌థ సాగ‌బోతోంద‌ని తెలుస్తోంది. ప్ర‌స్తుత విద్యావ్య‌వ‌స్థ‌లోని లోపాల్ని ఎత్తి చూపే విధంగా ఈ క‌థ ఉంటుంద‌ని, ధ‌నుష్ పాత్ర సీరియ‌స్ ఎమోష‌న్‌తో సాగ‌బోతోంద‌ని తెలుస్తోంది. తెలుగు, త‌మిళంతో పాటు హిందీలోనూ ఈ చిత్రాన్ని విడుద‌ల చేస్తారు. అంటే.. ధ‌నుష్ చేయ‌బోయే మ‌రో పాన్ ఇండియా సినిమా ఇద‌న్న‌మాట‌. వివ‌రాలు త్వ‌ర‌లో తెలుస్తాయి.