ఆంధ్రజ్యోతి ఎండీ వేమూరి రాధాకృష్ణ… మరో సిక్సర్ కొట్టే అవకాశాలు కనిపిస్తున్నాయి. వైఎస్ కుటుంబానికి బద్దశత్రువుగా మొదటి నుంచి అందరూ చూసే రాధాకృష్ణ…అతి త్వరలోనే వైఎస్ షర్మిలతో స్పెషల్ ఇంటర్యూ ప్లాన్ చేస్తున్నారు. షర్మిల టీం నుంచే ఈ మేరకు వచ్చిన సూచనకు.. రాధాకృష్ణ అంగీకారం తెలిపారని మీడియా వర్గాల్లో విస్తృత ప్రచారం జరుగుతోంది. ఏబీఎన్లో గతంలో వేమూరి రాధాకృష్ణ ప్రతీ వారం ఇంటర్యూలు చేసేవారు. ఓహెన్ హార్ట్ విత్ ఆర్కే పేరుతో ఆ ఇంటర్యూలు వారాంతాల్లో ప్రసారమయ్యేవి. మొదట్లో వివాదాస్పద ప్రశ్నలతో ఆప్రోగ్రాంకు ఆర్కే మంచి క్రేజ్ తెచ్చి పెట్టారు. చాలా కాలం పాటు నడిచిన ఆ ప్రోగ్రాం.. సరైన సెలబ్రిటీల్లేక ఆగిపోయింది. మళ్లీ ఇప్పుడు ప్రారంభించాలనే ఆలోచన చేస్తున్నారు.
షర్మిలతోనే ఓపెన్ హార్ట్ విత్ ఆర్కే ప్రోగ్రాంను రీలాంఛ్ చేయాలనుకుంటున్నట్లుగా చెబుతున్నారు. ఈ మేరకు ఇప్పటికే ఏర్పాట్లు పూర్తయ్యాయని అంటున్నారు. రాధాకృష్ణతో ఇంటర్యూ అంటే… షర్మిల కూడా ఎంతో జాగ్రత్తగా ఉండాల్సి ఉంటుంది. వైఎస్ కుటుంబంలో విబేధాలు ఉన్నాయని చెప్పేందుకు ఆయన ఈ ఇంటర్యూను ఉపయోగించుకుంటారు. అయితే షర్మిల మొత్తంగా రాజకీయ నేతగా మారారు కాబట్టి.. ఆమె ఎలాంటి ప్రొజెక్షన్ కోరుకుంటుందో..,. అదే ఇంటర్యూలో వెల్లడించే అవకాశం ఉంది. కుటుంబంలో గొడవలు ఉన్నాయని బయట పెట్టాలనుకుంటే పెడతారని అంటున్నారు. అయితే ఇతర మీడియాలకు కాకుండా షర్మిల ఆంధ్రజ్యోతికి ప్రాధాన్యం ఇవ్వడమే ఆసక్తి రేపుతోంది.
షర్మిల తెలంగాణలో తన రాజకీయ పార్టీకి మీడియా సహకారం ఎంతో అవసరం అని నమ్ముతున్నారు. సోదరుడి మీడియా కవరేజీ ఇవ్వడం లేదు. ఇతర మీడియాలు కవరేజీ ఇస్తున్నా.. వాటి అజెండా వేరు. తమ తమ యజమానులకు అవసరమైన పెద్దలకు ఉపయోగపడేంత వరకూ షర్మిలకు హైప్ ఇస్తాయి. తర్వాత కాడి కింద పడేస్తాయి. అందుకే షర్మిల తెలంగాణలో ఆంధ్రజ్యోతిని నమ్ముకుంటున్నట్లుగా కనిపిస్తోంది.
