టాలీవుడ్ లో ఇప్పుడు రెండు ర‌కాల సినిమాలే త‌యార‌వుతున్నాయి. ఓటీటీలో అవే విడుద‌ల అవుతున్నాయి. ఒక‌టి రాంగోపాల్ వ‌ర్మ తీస్తున్న సినిమాలు, రెండోది రాంగోపాల్ వ‌ర్మ‌పై తీస్తున్న సినిమాలు. బ‌యోపిక్‌ల పేరుతో.. వాస్త‌వ సంఘ‌ట‌న‌లు అని చెప్పి, దానికి మంచి మ‌సాలా జోడించి, కావ‌ల్సినంత ప‌బ్లిసిటీ తెచ్చుకుని – టికెట్లు తెంచుకోగ‌లుగుతున్నాడు వ‌ర్మ‌. ఇప్పుడు అదే దారిలో.. వ‌ర్మ‌పైనా సినిమాలు వ‌స్తున్నాయి. ఇప్ప‌టికే ఆర్జీవీపై `ప‌రాన్న జీవి` అనే సినిమా తీశారు. జొన్న‌విత్తుల ద‌ర్శ‌క‌త్వంలో ఓ సినిమా రెడీ అవుతోంది. ఇప్పుడు `రాడ్‌ గోపాల్ వ‌ర్మ` అంటూ మ‌రో సినిమా వదులుతున్నారు.

ఇందులో ఆర్జీవీ.. `శివ‌` సినిమా ముందు ఎలా ఉండేవాడో చూపించ‌బోతున్నారు. అందుకు సంబంధించిన ఫ‌స్ట్ లుక్‌పోస్ట‌ర్ కూడా విడుద‌లైంది. పంజాగుట్టు పోలీస్ స్టేష‌న్‌లో ఓ వ్య‌క్తి.. న‌గ్నంగా కూర్చున్న ఫొటో అది. `బ్లూ ఫిల్మ్ క్యాసెట్లు అమ్ముతున్న వ్య‌క్తిని అరెస్టు చేసిన పోలీసులు` అంటూ పేప‌ర్ క‌టింగ్ కూడా జోడించారు. అప్ప‌ట్లో వ‌ర్మ‌.. పంజాగుట్ట‌లో సీడీ షాపు న‌డిపేవాడు. అక్క‌డే సినిమా వాళ్ల‌తో ప‌రిచ‌యాలు మొద‌ల‌య్యాయి. వ‌ర్మ కెరీర్ ప్రారంభాన్ని చాప్ట‌ర్ 1 ద్వారా చూపించ‌బోతున్నారన్న‌మాట‌. మొత్తానికి వ‌ర్మ పై సినిమాని,. వ‌ర్మ దారిలోనే తీయ‌డానికి ఫిక్స‌య్యారు. మ‌రి రిజ‌ల్ట్ ఎలా ఉంటుందో?