డైలాగ్ కింగ్ గా గుర్తింపు తెచ్చుకున్నారు సాయి కుమార్. డబ్బింగ్ ఆర్టిస్టుగా, క్యారెక్టర్ నటుడిగా, ప్రతినాయకుడిగా.. తనలోని చాలా పార్శ్వాలు చూపించారు. హీరోగానూ విజృంభించారు. పోలీస్ కథంటే ముందుగా గుర్తొచ్చేది సాయికుమారే. ఇప్పుడు బుల్లి తెర వ్యాఖ్యాతగా మారి, గేమ్ షోలు నడిపిస్తున్నారు. త్వరలోనే సాయికుమార్ మెగాఫోన్ పట్టబోతున్నారు. ఈ విషయాన్ని ఆయనే చెప్పారు.
“చిన్నప్పటి నుంచి కథలు చెప్పడం నాకు బాగా అలవాటు. అలా కథల గురించి ఆలోచిస్తూ ఉండేవాడ్ని. ఇప్పటికీ ఆ అలవాటు మానలేదు. నవరసాలూ ఉండేలా ఓ కుటుంబ కథని తయారు చేసుకుంటున్నా. అది స్క్రిప్టు దశలో ఉంది. ఈ కథతోనే మెగాఫోన్ పడతా“ అన్నారు. సాయికుమార్ అనగానే పోలీస్ స్టోరీ గుర్తొస్తుంది. వచ్చే యేడాదికి ఈ సినిమా విడుదలై పాతికేళ్లు. ఈసందర్భంగా పోలీస్ స్టోరీ సీక్వెల్గా `నాలుగో సింహం` అనే సినిమా తీస్తున్నార్ట. ఇందులో సాయికుమార్, ఆది కలిపి నటించబోతున్నారు. ఈ చిత్రానికి థ్రిల్లర్ మంజు దర్శకత్వం వహిస్తారు.
