ఈరోజుంతా అల్లరోడి హవానే. నరేష్ పుట్టిన రోజు సందర్భంగా నాంది టీజర్ వచ్చింది. ఇప్పుడు బంగారు బుల్లోడు వంతు వచ్చింది. గిరి దర్శకత్వం వహిస్తున్న ఈ చిత్రంలో పూజా జావేరి కథానాయిక. ఏకే ఎంటర్టైన్మెంట్స్ సంస్థ నిర్మిస్తోంది. షూటింగ్ పూర్తయ్యింది. థియేటర్ల రీ ఓపెన్ కోసం ఎదురు చూస్తున్న ఈ బుల్లోడి టీజర్ని నరేష్ పుట్టిన రోజు సందర్భంగా విడుదల చేశారు.
నగల్ని తాకట్టు పెట్టుకుని అప్పులిచ్చే ఓ బ్యాంకులో పనిచేస్తుంటాడు నరేష్. ఆ నగల్ని లాకర్లో దాచకుండా.. అద్దెకు తిప్పుతూ – డబ్బులు గడించే ఉద్యోగులు ఆ బ్యాంకులో ఉంటారు. ఆ నగలతో – వచ్చే చిక్కులే ఈ బంగారు బుల్లోడు కథ. బంగారం చుట్టూ తిరిగే కథ కాబట్టి – బంగారు బుల్లోడు అనే టైటిల్ ఫిక్స్ చేశారు. నరేష్ శైలికి తగిన కథ ఇది. అక్కడక్కడ కొన్ని పంచ్లూ, సిట్యువేషనల్ కామెడీతో టీజర్ని లాగించేశారు. టీజర్లో పెద్దగా మెరుపులేం లేవు. కాకపోతే… సినిమా అంతా సరదాగా సాగిపోతుందన్న విషయంలో మాత్రం చిత్రబృందం గ్యారెంటీ ఇచ్చింది. హీరోగా ఈమధ్య బాగా వెనకడిపోయాడు నరేష్. ఈ దశలో ఓ హిట్టు కొట్టడం అత్యవసరం. మరి ఈ బుల్లోడు ఏం చేస్తాడో?
