ఓంకార్ `రాజుగారి గది 3`కి అర్థాంతరంగా బ్రేక్ పడింది. ఈ సినిమా నుంచి తమన్నా వాక్ అవుట్ అయ్యింది. స్క్రిప్టులో మార్పులు చేర్పులకు ఓంకార్ ఒప్పుకోకపోవడంతోనే తమన్నా ఈ ప్రాజెక్టు నుంచి తప్పుకుందని టాక్. తమన్నా స్థానంలో ఎవరిని తీసుకోవాలో తెలీక ఓంకార్ తర్జన భర్జనలు పడుతున్నట్టు తెలుస్తోంది. ఇది వరకే ఈ కథ సమంత దగ్గరకు వెళ్లింది. సమంత సున్నితంగా తిరస్కరించడంతో కొన్ని మార్పులు చేసి తమన్నా దగ్గరకు తీసుకెళ్లాడు. ఇప్పుడు తమన్నా కూడా తప్పుకుంది.
ఓంకార్ ముందున్న బలమైన ప్రత్యామ్నాయం.. తాప్సి. ఈమధ్య తాప్సి లేడీ ఓరియెంటెడ్ కథలతోనే ప్రయాణం చేస్తోంది. మంచి విజయాల్నీ అందుకుంటోంది. తాప్సి అయితే ఈ కథకు న్యాయం చేయగలదని ఓంకార్ భావిస్తున్నాడు. పైగా తాప్సికి ఇప్పుడు మార్కెట్ పెరిగింది. తాప్సి తోడైతే ఈ సినిమాని హిందీలోనూ అమ్ముకునే ఛాన్స్ ఉంది. అయితే తాప్సి కథల విషయంలో చాలా బెట్టు చూపిస్తోంది. తమన్నానే కాదన్న కథని తాప్సి ఎలా ఒప్పుకుంటుందన్నది పెద్ద ప్రశ్న. తమన్నా చెప్పిన మార్పులు చేసేసి.. మళ్లీ తమన్నానే ఈ కథలోకి తీసుకురావాలా? లేదంటే తాప్సిని ఎలాగైనా ఒప్పించి ప్రాజెక్టుని పట్టాలెక్కించాలా? అనే విషయంలో ఓంకార్ మల్లగుల్లాలు పడుతున్నాడు. ఏం తేలుతుందో చూడాలి.
