గోదావరి జిల్లాలల్లో కొబ్బరితోటలు ముసలివైపోతున్నాయి. దాదాపు సగం తోటల వయసు 60 ఏళ్ళు దాటుతున్నాయి. కాయలు కుంచించుకుపోతున్నాయి. ఇదేపరిస్ధితి కొనసాగితే ఇంకో పదిపన్నెండేళ్ళలో కొబ్బరి అంతరించిపోతుంది. ఈ నేపధ్యాన్ని కార్పొరేట్ రంగం వినియోగించుకుంటోంది.

రాజమండ్రి సమీపాన వి2సి గ్రూప్ త్వరలో ‘ఇంటిగ్రేటెడ్ కోకో పార్కు’ నెలకొల్పనున్నది. 250 కోట్ల రూపాయల నుంచి 300 కోట్ల రూపాయల వ్యయం కాగల కోకో పార్కులో ప్రధాన పరిశ్రమ (యాంకర్ ఇండస్ట్రీ)ని వి2సి గ్రూప్ నెలకొల్పుతుంది. పార్కులో అనుబంధంగా ఏర్పాటయ్యే పరిశ్రమల పెట్టుబడి మరో 300 కోట్ల రూపాయల నుంచి 350 కోట్ల రూపాయలుగా ఉంటుందని అంచనా.

కోకో పార్కు ఏర్పాటులో ఉద్దేశం ‘ఎండ్ టు ఎండ్ కాన్సెప్ట్ ప్ట్’ .అంటే కొబ్బరి పంట ఉత్పత్తి నుంచి దిగుబడి దాకా, కొబ్బరి కాయలో ప్రతి పదార్థాన్ని వినియోగంలోకి తీసుకొచ్చి పంటను రైతుకు లాభసాటిగా మారుస్తామని వి2సి సంస్థ చెబుతోంది.

కోకో పార్కు ఏర్పాటు వల్ల కంపెనీలు పంటను వెనువెంటనే కొనుగోలు చేసి అక్కడికక్కడే డబ్బు చెల్లిస్తాయని పూర్తిస్థాయి పంట దిగుబడి మెరుగుపరిచే అత్యంత అధునాతన సాంకేతిక పరిజ్ఞానాన్ని ఉపయోగిస్తామని సంస్ధ సిఎండి రామ్ కుమార్ వివరిస్తున్నారు..

కోకో పార్కు ప్రధాన పరిశ్రమతోపాటు అనుబంధంగా మరో 15 పరిశ్రమలు వస్తాయని, కొబ్బరి పంట ఉత్పత్తికిగాను రైతులకు అదనపు ఆదాయాన్ని ఆర్జించి పెట్టడం కోకో పార్కు ఏర్పాటు ప్రధాన ధ్యేయమన్నారు. కొబ్బరి పంట మార్కెటింగ్ జాతీయ, అంతర్జాతీయ మార్కెట్‌కు అనుసంధానం జరుగుతుందని, ముడి కొబ్బరి పంట, కొబ్బరి నుంచి టెంకాయ, పీచు, ఇలా ప్రతి పదార్థాన్ని వినియోగంలోకి తెస్తామని అన్నారు.

కోకో పార్కు ఆధ్వర్యంలో తాము 10 వేల మంది యువ రైతుల్ని ఎంపిక చేసి ఆధునిక పరిజ్ఞానం ఉపయోగించటంలో సుశిక్షితులుగా తీర్చిదిద్దుతామని, ఎంటర్‌ప్రెన్యూర్స్ గా మారుస్తామని చెప్పారు. 3 వేల మంది కొబ్బరి రైతులతో ఒక గ్రూప్ చొప్పున ఏర్పాటు చేస్తామన్నారు. దీనివల్ల వారు కొబ్బరి దిగుబడిలో పరిజ్ఞానం పెంచుకుంటారని తెలిపారు.