సమంత కి కాస్త ఆవేశం ఎక్కువే. ఏదీ మనసులో దాచుకోదు. ఇది వరకు కూడా చాలా సందర్భాల్లో నోరు జారి… టాప్ సీక్రెట్లను బయటపెట్టేసింది. ఈసారీ అదే జరిగింది. ‘మన్మథుడు 2’లో సమంత ఓ పాత్ర చేస్తోంది. ఈ విషయాన్ని సమంతే మీడియాకి చెప్పింది. నిజానికి ఈ విషయాన్ని అతి జాగ్రత్తగా దాచి, సినిమా విడుదల సమయంలో బయటపెట్టి షాక్ ఇవ్వాలని చూసింది చిత్రబృందం. ఈ విషయాన్ని సమంతకు ముందే చెప్పారు కూడా. కానీ సమంత మాత్రం తన ఆనందాన్ని ఆపుకోలేక… మీడియాకి చెప్పేసింది.
శనివారం చై- సమంత ఇద్దరూ కలసి ప్రింట్ మీడియాకు ఇంటర్వ్యూలు ఇచ్చారు. ఈ సమయంలో ‘మన్మథుడు 2’ ప్రస్తావన వచ్చింది. అందులో నటిస్తున్నారా? అంటూ పాత్రికేయులు క్లారిటీ కోసం అడిగారు. దాంతో చైతన్య అందుకుని… ”నువ్వేగా మీడియాకు లీక్ చేసేశావ్. దానికి నువ్వే సమాధానం చెప్పు.” అంటూ సమంతని సరదాగా ఆట పట్టించాడు. దాంతో.. సమంత కూడా ”అవును నటిస్తున్నాను..” అనేసింది. అయితే మన్మథుడు 2లో సమంత కథానాయిక కాదు. కథని నడిపించే ఓ కీలకమైన పాత్ర.
