కర్నూలు జిల్లాలో ఉన్న రాజకీయ దిగ్గజ కుటుంబాన్ని తెలుగుదేశం పార్టలో చేరిపోయాయి. కోట్ల, కేఈ, గౌరు, భూమా కుటుంబాలన్నీ.. టీడీపీలోనే ఉన్నాయి. కర్నూలు జిల్లాలో ఉన్న సీట్లలో దాదాపుగా.. అంతా వీరు.. లేదా వీరి అనుచరులు పోటీ చేయడం ఖాయమైపోయింది. దాంతో.. ఇప్పటి వరకూ టిక్కెట్లపై ఆశలు పెట్టుకున్న కొంత మంది… నిరాశ చెందుతున్నారు. తమకు అవకాశాలు కల్పించే పరిస్థితి లేకపోవడంతో..పక్క చూపులు చూస్తున్నారు. కోట్ల కుటుంబం చేరికతో కేఈ కుటుంబం అసంతృప్తికి గురి కాకుండా.. సర్దుబాటు చేసినా… గౌరు కుటుంబం టీడీపీలో చేరికతో మాత్రం సైడ్ ఎఫెక్టులు ఉండటం ఖాయంగా కనిపిస్తోంది. పాణ్యం టిక్కెట్ను టీడీపీ తరపున.. మాజీ మంత్రి ఏరాసు ప్రతాప్ రెడ్డి ఆశిస్తున్నారు. ఆయన గత ఎన్నికలకు ముందు కాంగ్రెస్ ప్రభుత్వంలో మంత్రిగా ఉండేవారు. రాష్ట్ర విభజన తర్వాత టీడీపీలో చేరారు. పోటీ చేసి ఓడిపోయారు.
ఆ తర్వాత టీడీపీలో కొనసాగుతున్నారు. ఈ ఎన్నికల్లో పాణ్యం నుంచి పోటీ చేయాలనుకున్నారు. కానీ.. గౌరు చరిత టీడీపీలోకి రావడంతో.. ఆమెకు చంద్రబాబు చాన్సిచ్చారు. మరెక్కడా.. ఏరాసు ప్రతాప్ రెడ్డికి అవకాశం దక్కే సూచనలు కనిపించడం లేదు. శ్రీశైలంలోనూ… వైసీపీ నుంచి టీడీపీలో చేరిన బుడ్డా రాజశేఖర్ రెడ్డికి.. టిక్కెట్ ఖరారు చేశారు. దాంతో.. ఏరాసు.. అసంతృప్తికి గురయ్యారు. ఆయన పార్టీ వీడతరాని ప్రచారం జరుగుతోంది. అదే సమయంలో నంద్యాల సిట్టింగ్ ఎంపీ ఎస్పీవై రెడ్డి కూడా.. అసంతృప్తితో ఉన్నారు. ఆయన వయోభారం కారణంగా.. బరిలోకి దిగడం అనుమానమే. అయితే తన అల్లుడికి టిక్కెట్ ఇవ్వాలని ఆయన పట్టు బడుతున్నారు. అవకాశం మాత్రం రావడం అనుమానాస్పదంగా ఉంది. దాంతో ఆయన కూడా అనుచరులతో సమావేశం అవుతున్నారు. ఇక నంద్యాల ఎన్నికల సమయంలో.. పార్టీలో చేరిన గంగుల ప్రతాప్ రెడ్డి.. నంద్యాల పార్లమెంట్ టిక్కెట్ వస్తుందన్న ఆశతో ఉన్నారు.
కానీ.. ఆ టిక్కెట్ ఇప్పుడు గౌరు చరిత సోదరుడు మాండ్ర శివానందరెడ్డికి ఖరారు చేశారని ప్రచారం జరుగుతోంది. వీరిలో ఎంత మందిని చంద్రబాబు బుజ్జగిస్తారన్నదానిపై క్లారిటీ లేదు కానీ… వారికి ఇతర పార్టీల్లో ఆప్షన్లు వస్తే మాత్రం.. వెళ్లి పోవడం ఖాయంగా కనిపిస్తోంది. అయితే.. వెళ్లే వాళ్ల కన్నా… వచ్చే వాళ్లే ప్రజాబలం కలిగిన వారని.. టీడీపీ నేతలు నమ్మకంగా ఉన్నారు.
