రాజకీయాల్లో మహా అయితే పదవికి మూడుతుంది. అంతే తప్ప ‘చెవి’కి మూడడం ఏమిటి అనే సందేహం కలుగుతోంది కదా! అదే మరి సరదా నిండిన కబురు! సీపీఐ పార్టీకి చెందిన సీనియర్ నాయకుడు నారాయణ గారి ‘చెవి’ కి గండం పొంచి ఉన్నదేమో అనే అనుమానాలు పలువురు విశ్లేషకులకు కలుగుతున్నాయి. ఎందుకంటే.. అందరూ తమ తమ పదవుల మీద పందేలు కాస్తూ, సవాళ్లు విసురుకుంటూ ఉంటే.. తనకంటూ వదులుకోవడానికి పదవులేమీ లేవు గనుక.. నారాయణ గారు మాత్రం తన ‘చెవి’ మీద పందెం కాస్తున్నారు.. సవాళ్లు విసురుతున్నారు.
తెరాస సొంత బలంతో గ్రేటర్ మేయర్ పీఠాన్ని దక్కించుకుంటే గనుక.. తాను చెవి కోసుకుంటానంటూ నారాయణ కొత్తగా సవాలు విసిరారు. నిజానికి వామపక్షాలకు గ్రేటర్ ఎన్నికల్లో పెద్దగా ప్రాధాన్యం లేదు. కాకపోతే.. తమ ఉనికికి ప్రమాదం రాకుండా.. ఉభయ వామపక్షాలు, లోక్సత్తా తో కూడా కలిసి కొన్ని డివిజన్లలో మాత్రం పోటీచేస్తున్నాయి.
అయితే నారాయణ తెరాసకు సవాలు విసురుతుండడం విశేషం. గులాబీ జెండా రెపరెపలాడిస్తామని ఆ పార్టీ వారంతా పదేపదే చెబుతోంటే.. ఫక్తు సొంతబలంతో తెరాస మేయర్ పీఠాన్ని దక్కించుకుంటే గనుక.. తాను చెవి కోసుకుంటానంటూ నారాయణ అంటున్నారు. అందుకే ఆయన చెవికి గండం పొంచి ఉన్నదేమో అని విశ్లేషకులు భావిస్తున్నారు.
గ్రేటర్లో మేయర్ పీఠానికి సగానికంటె ఎక్కువ మంది సభ్యుల ఓట్లు రావాలా, చేతులెత్తే పద్ధతిలో.. లార్జెస్ట్ పార్టీ బలాన్ని చాటుకుంటే సరిపోతుందా అనే విషయంలో ఇంకా కాస్త సస్పెన్స్ ఉంది. చేతులెత్తే పద్ధతిలోనే మేయర్ ఎన్నిక ఉంటుందని ఇటీవల విధివిధానాలు వచ్చాయి. ఆ నేపథ్యంలో.. అదే జరిగితే గనుక.. ఎటూ సింగిల్ లార్జెస్ట్ పార్టీగా తెరాస ఆవిర్భవించే అవకాశాలు ఎక్కువ. అలా వారు గద్దె మీదకు వెళ్లినా ఆశ్చర్యం లేదు. అదే జరిగితే.. నారాయణ గారు పాపం చెవి కోసుకోవాల్సి వస్తుందేమో.. అని జనం జోకులేసుకుంటున్నారు.
అవునుగానీ.. చెవికోసుకునే పరిస్థితే వస్తే.. ఆయన కళ్లజోడు ఎలా పెట్టుకుంటారు చెప్మా!!
