ఒకప్పుడు మణిరత్నం అంటే సగటు సినీ అభిమానులతో పాటు… హీరోలంతా పడి చచ్చిపోయేవారు.
‘నేను మణిరత్నం అభిమానిని’ అని చెప్పుకోవడం హీరోలకు ఓ ఫ్యాషన్గా మారింది. చాలామంది ఇప్పటికీ ఆహా మణిరత్నం.. ఓహో మణిరత్నం అంటూ భజన చేస్తూనే ఉంటారు. కాకపోతే మణిరత్నంతో సినిమా చేయాల్సిన పరిస్థితి వచ్చినప్పుడు మాత్రం `సైలెంట్`గా జారుకుంటున్నారు. ప్రస్తుతం టాలీవుడ్లో అలాంటి పరిస్థితే కనిపిస్తోంది. తెలుగులో ఓ సినిమా చేయాలని మణి ఎప్పటి నుంచో ప్రయత్నిస్తున్నారు. కానీ… తన కథకు సరిపడా హీరో దొరకడం లేదు. దొరికినా.. వాళ్లెవ్వరూ ఇప్పుడున్న పరిస్థితుల్లో మణిరత్నంతో సినిమా చేయడానికి ఉత్సాహం చూపించడం లేదు. అలా.. మణి స్క్రిప్టు ఒకటి టాలీవుడ్లో తెగ చక్కర్లు కొడుతోంది. యువ హీరోల వెంట తిరుగుతోంది.
ఈ కథ ముందు విజయ్ దేవరకొండ దగ్గరకు వెళ్లింది. విజయ్ ఈ సినిమా చేయడానికి ఒప్పుకున్నాడు కూడా. కానీ అంతలోనే డ్రాప్ అయ్యాడు. విజయ్ తరవాత నాని వరకూ ఈ కథ వెళ్లింది. నాని మణిరత్నంకి వీరాభిమాని. ఆయనతో సినిమా చేయాలని ఎప్పటి నుంచో చూస్తున్నాడు. అయినా సరే.. నాని స్పందించలేదు. ఇప్పుడు ఇదే కథ శర్వానంద్ వరకూ వెళ్లింది. శర్వా కూడా కథ విని.. మొహమాటం లేకుండా ‘నో’ అనేశాడట. అయినా సరే.. మణిరత్నం తన ప్రయత్నాలు ఆపడం లేదని తెలుస్తోంది. కథానాయకుల్ని నమ్ముకోకుండా ఎప్పుడూ తన కథనే నమ్ముకునే దర్శకుడు మణిరత్నం. కొత్తవాళ్లతో ప్రయోగాలు చేయడానికి వెనుకంజ ఎప్పుడూ వేయలేదు. స్టార్ల వెంట కూడా తిరగలేదు. అలాంటిది ఓ కథ పట్టుకుని, హీరోని వెదికే పనిలో నెలలు నెలలు శ్రమిస్తున్నాడంటే… మణిరత్నం క్రేజ్ ఏ స్థాయికి వెళ్లిపోయిందో అర్థం అవుతూనే ఉంది. మరి ఈ కథ ఏ హీరో దగ్గరకు వెళ్లి ఆగుతుందో చూడాలి.
