తెలుగు రాష్ట్రాలు రెండు అనే సంగతి తనకు గుర్తులేదంటున్నాడు విజయ్ దేవరకొండ. ‘గీత గోవిందం’ విజయం తర్వాత ఈ హీరో నటించిన సినిమా ‘నోటా’. తెలుగు, తమిళ భాషల్లో రూపొందిన ఈ సినిమా అక్టోబర్ 5న ప్రేక్షకుల ముందుకొస్తుంది. పబ్లిసిటీలో భాగంగా ఆదివారం రాత్రి విజయవాడలో ఫంక్షన్ నిర్వహించారు. అందులో పైన చెప్పినట్టు తెలుగు రాష్ట్రాలు రెండనే సంగతి తనకు గుర్తులేదన్నాడు. ఎవరికైనా గుర్తుంటుందా? అని ప్రశ్నించాడు. ‘‘మొన్న ‘రెండు రాష్ట్రాలకు ఒకే రౌడీ. ఒకే లీడర్. ఒకే ముఖ్యమంత్రి’ అని ట్వీట్ చేశా. దానికి బదులుగా చాలామంది ‘రెండు రాష్ట్రాలేంటి? తమిళనాడు, తెలంగాణ, ఆంధ్రప్రదేశ్.. మొత్తం మూడు రాష్ట్రాలు కదా?’ అన్నారు. అప్పుడు ‘అయ్య బాబోయ్! మనకు రెండు రాష్ట్రాలున్నాయి కదా!’ అని గుర్తు వచ్చింది’’ అని విజయ్ దేవరకొండ వ్యాఖ్యానించాడు. ఈతరం ప్రజలకు రెండు రాష్ట్రాలని గుర్తు వుంటుందేమో గానీ, తన వయసు వారికి ఒక్కటేనని అన్నాడు.
‘ఎవడే సుబ్రమణ్యం’ టైమ్లో, మూడేళ్ళ కిత్రం తొలిసారి విజయవాడకు వెళ్ళానని… ఈ మూడేళ్ళల్లో నాలుగు సినిమాలు చేయగా, ఒకటి దొబ్బిందనీ, మూడు హిట్టయ్యాయని విజయ్ దేవరకొండ అన్నాడు. ఇంకా మాట్లాడుతూ ‘‘మా ‘ఎవడే సుబ్రమణ్యం’ నిర్మాతలు అశ్వినీదత్, సప్నాదత్ వాళ్ళది విజయవాడ. ఆ సినిమా టైమ్లో ఇక్కడికి వస్తుంటే… సూర్యాపేట దాటాక సప్న అక్క ‘ఇక్కడవరకూ నిన్ను గుర్తుపట్టారు. ఇక్కడి నుంచి గుర్తుపడితే.. నువ్వు స్టార్రా! నిన్ను ఎవరూ ఆపలేరు’ అంది. స్వప్నఅక్కా.. చూడు. మీ ఊరిలో నా వాళ్ళు చాలామంది ఉన్నారు’’ అన్నాడు.
