బాలీవుడ్ వాళ్లెంతైనా ప‌క్కా ప్రొఫెష‌న‌ల్స్‌. ఏ సినిమా చేసినా, అందుకు త‌గిన హోంవ‌ర్క్ పూర్తి చేసే సెట్లో అడుగుపెడ‌తారు. ప్ర‌స్తుతం విద్యాబాల‌న్ అదే చేస్తోంది. `ఎన్టీఆర్‌` బ‌యెపిక్‌లో విద్యాబాల‌న్ ఓ కీల‌క పాత్ర పోషిస్తున్న సంగ‌తి తెలిసిందే. ఆమెకు ఇదే తొలి తెలుగు సినిమా. అందుకే… తెలుగు అల‌వాటు చేసుకునే ప్ర‌య‌త్నం చేస్తోంద‌ట‌. అంతేకాదు.. కొన్ని తెలుగు సినిమాల్ని ఏక‌ధాటిగా చూస్తోంద‌ట‌. అవ‌న్నీ ఎన్టీఆర్, బాల‌కృష్ణ సినిమాలే అని ఇన్ సైడ్ వ‌ర్గాల టాక్‌. ఎన్టీఆర్ బ‌యోపిక్‌లో కీక‌ల పాత్ర కాబ‌ట్టి, ఎన్టీఆర్ కి సంబంధించిన సినిమాలు కొన్ని చూసింద‌ట విద్యాబాల‌న్‌. బాల‌య్య‌తో చేయాలి కాబ‌ట్టి.. ఆయ‌న సినిమాల్నీ చూడ్డం మొద‌లెట్టింద‌ట‌. పెద్ద ఎన్టీఆర్ `దాన‌వీర శూర‌క‌ర్ణ‌`, బాల‌య్య‌ది `గౌత‌మిపుత్ర శాత‌కర్ణి` చిత్రాలు విద్యాబాల‌న్ చూసిన లిస్టులో ఉన్నాయ‌ని తెలుస్తోంది. విద్యాబాల‌న్ కోసం చిత్ర‌బృందం ఓ తెలుగు ట్యూట‌ర్‌ని నియ‌మించ‌బోతోంది. ఇప్ప‌టికే విద్యాబాల‌న్ తెలుగు పాఠాలు నేర్చుకోవ‌డం మొద‌లెట్టింద‌ట‌. డ‌బ్బింగ్ త‌న‌కు తాను చెప్పుకోక‌పోయినా.. సెట్లో ప్రామ్టింగ్ అవ‌స‌రం లేకుండా సంభాష‌ణ‌లు ప‌ల‌కాల‌ని విద్యాబాల‌న్ భావిస్తోంది. బాలీవుడ్ స్టార్ అయ్యిండి, ఓ ప్రాంతీయ సినిమా కోసం ఇంతిలా ముంద‌స్తు క‌స‌ర‌త్తులు చేస్తోందంటే విద్య‌ని మెచ్చుకోవాల్సిందే.