తెలుగు ప్రేక్షకులు ఆల్మోస్ట్ పూనమ్ కౌర్ని మర్చిపోయిన దశలో… పవన్ అభిమానులు వర్సెస్ కత్తి మహేష్ మధ్య ఏర్పడిన రచ్చ కారణంగా మళ్ళీ లైమ్లైట్లోకి వచ్చిందీ బ్యూటీ. కొత్తగా వచ్చిన వివాదాలు ఆమెకు కొత్త కొత్త అవకాశాలనూ తెచ్చిపెట్టాయి. రెండేళ్ల కిందట వచ్చిన ‘నాయకి’లో అతిథి పాత్ర తప్ప… మూడేళ్లుగా ఆమె తెలుగు సినిమాలు ఏవీ చేయలేదు. అటువంటిది ఒక్కసారిగా ‘బాహుబలి’ని నిర్మించిన ఆర్కా మీడియా సంస్థ నిర్మించే సీరియల్ ‘స్వర్ణఖడ్గం’లో ఆమెకు అవకాశం వచ్చింది. దీంతో పాటు చక్కటి కుటుంబ కథా చిత్రంలో నటించే అవకాశం వచ్చింది.
కుటుంబకథా చిత్రాల నిర్మాత ‘దిల్’ రాజు నిర్మాణ సారధ్యంలో శ్రీ వెంకటేశ్వర క్రియేషన్స్ సంస్థ నిర్మిస్తున్న సినిమా ‘శ్రీనివాసకళ్యాణం’. ‘శతమానం భవతి’ తరవాత అదే సంస్థలో సతీష్ వేగేశ్న దర్శకత్వం వహిస్తున్న సినిమా ఇది. నితిన్, రాశి ఖన్నా జంటగా నటిస్తున్నారు. పెళ్లి నేపథ్యంలో తెరకెక్కుతోన్న చక్కటి కుటుంబ కథా చిత్రమిది. ఇందులో పూనమ్ కౌర్ కీలక పాత్ర చేస్తుంది. రాశి ఖన్నాతో పాటు నందితా శ్వేతా మరో నాయికగా నటిస్తున్నారీ సినిమాలో. మరి, పూనమ్ పాత్ర ఎలా వుంటుందో?
