హైదరాబాద్: తిరుమల వెంకటేశ్వరస్వామికి చెన్నైకు చెందిన ఒక ముస్లిమ్ రు.30 లక్షల విలువ చేసే ఒక నూతన వాహనాన్ని కానుకగా సమర్పించి తన మతసామరస్యాన్ని చాటుకున్నారు. అబ్దుల్ గని అనే ఈ భక్తుడు గతంలో కూడా తిరుమలలోని టీడీడీవారి అశ్వని వైద్యశాలకు పరికరాలు వితరణగా ఇచ్చారు. ఇవాళ ఉదయం గని సమర్పించిన వాహనం ఇన్సులేట్ చేసినది. దీనిని స్వామివారికి కూరగాయలు రవాణా చేయటానికి వాడబోతున్నారు. ఈ ఉదయం ఆలయం ఎదుట దీనికి పూజలు నిర్వహించారు. తదనంతరం టీటీడీ వారి రవాణాశాఖకు అప్పగించారు. ఈ సందర్భంగా గనిని టీటీడీ డిప్యూటీ ఈఓ చెన్నంగారి రమణ సత్కరించారు. ఈ వాహనానికి శ్రీవారి కూరగాయల రథం అని పేరు పెట్టారు.