ఈ ఏడాది దాదాపు అరడజను అగ్ర హీరోలు గ్యాప్ ఇచ్చారేమో గానీ హీరోయిన్స్ మాత్రం బాగానే సందడి చేశారు. పూజా హెగ్డే లాంటి టాప్ హీరోయిన్ నుంచి సినిమా లేనప్పటికీ మిగతా టాప్, మీడియం, కొత్త హీరోయిన్స్ ఆకట్టుకున్నారు. ఒక్కసారి ఆ వివరాల్లోకి వెళితే…
2023 శ్రుతి హాసన్ కి భలే కలిసొచ్చింది. ఈ ఏడాది మూడు పెద్ద సినిమాలు చేసింది. సంక్రాంతి బరిలో వచ్చిన వీరసింహారెడ్డి, వాల్తేరు వీరయ్య చిత్రాలలో కథానాయికగా సందడి చేసింది. ఈ రెండు బాక్సాఫీసు వద్ద మంచి విజయాల్ని నమోదు చేశాయి. ఇప్పుడు ప్రభాస్ సలార్ తో పాన్ ఇండియా విజయాన్ని అందుకుంది. అన్నట్టు.. నాని హాయ్ నాన్న సినిమాలో ఓ స్పెషల్ సాంగ్ చేసింది. ఈ సినిమా కూడా డీసెంట్ విజయాన్ని అందుకుంది. ఈ రకంగా ఈ ఏడాది వందశాతం సక్సెస్ రేట్ తో అలరించింది శ్రుతి హసన్.
మార్చిలో ‘దసరా’తో వచ్చింది కీర్తి సురేష్. ఈ సినిమా విజయాన్ని అందుకోవడంతో పాటు కీర్తి నటనకు మంచి మార్కులు పడ్డాయి. కథలో కీలకమైన, నటించే అవకాశం వుండే పాత్ర ఆమెకి దక్కింది. వెన్నల పాత్రలోని ఎమోషన్ ప్రేక్షకులకు కనెక్ట్ అయ్యింది. అలాగే ఇందులో పెళ్లి కూతురు గెటప్ లో కీర్తి చేసిన చేసిన తీన్మార్ డ్యాన్స్ కూడా బాగా వైరల్ అయ్యింది. దసరా తర్వాత భోళా శంకర్ లో చిరంజీవి సిస్టర్ పాత్రలో కనిపించింది. ఈ సినిమా మాత్రం నిరాశ పరిచింది. ప్రస్తుతం ఆమె చేతిలో తెలుగు సినిమాలు లేవు కానీ దాదాపు నాలుగు తమిళ సినిమాలతో బిజీగా వుంది.
సమంతకు 2023 మిశ్రమ ఫలితాల్ని ఇచ్చింది. సమంత టైటిల్ రోల్ లో చేసిన శాకుంతలం బాక్సాఫీసు వద్ద డిజాస్టర్ ఫలితాన్ని చూసింది. చాలా విరామం తర్వాత గుణశేఖర్ దర్శకత్వంలో వచ్చిన ఈ సినిమా కోసం సమంత చాలా కష్టపడింది. ఆరోగ్యం సహకరించినపోయినప్పటికీ పోస్ట్ ప్రొడక్షన్, ప్రమోషన్స్ లో పాల్గొంది. సినిమా మాత్రం దారుణమైన ఫలితాన్ని చూసింది. ఐతే విజయ్ దేవరకొండ తో చేసిన ఖుషి మాత్రం మంచి ఫలితాన్ని ఇచ్చింది. ప్రస్తుతం చెన్నై స్టోరీస్ హాలీవుడ్ లో అడుగుపెట్టడానికి సిద్ధంగా వుంది సమంత.
ఈ ఏడాది ఇద్దరు సీనియర్ హీరోయిన్స్ మళ్ళీ కమ్ బ్యాక్ ఇచ్చారు. భాగమతి తర్వాత మళ్ళీ థియేట్రికల్ సినిమా చేయలేదు అనుష్క. మధ్యలో నిశ్శబ్దం సినిమా చేసినా అది ఓటీటీ పరిమితమైయింది. ఎట్టకేలకు ఈ ఏడాది మిస్ శెట్టి మిస్టర్ పోలిశెట్టి సినిమా తో మళ్ళీ ప్రేక్షకుల ముందుకు వచ్చింది. ఈ సినిమా డీసెంట్ విజయాన్ని అందుకుంది. వివాహం తర్వాత కాజల్ సినిమాల జోరు తగ్గింది. ఓ బాబుకు జన్మనిచ్చి కొంత విరామం తర్వాత భగవంత్ కేసరిలో బాలకృష్ణ తో జోడి కట్టింది కాజల్. ఈ సినిమా పెద్ద విజయాన్ని అందుకుంది. ఈ రకంగా కాజల్ ఖాతాలో ఓ మంచి విజయం పడింది.
తమన్నా హీరోయిన్ గా చేసిన భోళా శంకర్ బాక్సాఫీసు వద్ద నిరాశపరిచినప్పటికీ.. తమన్నా స్పెషల్ రోల్ చేసిన జైలర్ సినిమా మాత్రం సూపర్ హిట్ అయ్యింది. అందులో చేసిన కావాలయ్యా పాట చాలా వైరల్ అయ్యింది. సినిమా విడుదలకు ముందు తర్వాత ఆ పాట ఆడియన్స్ అమితంగా అలరించింది.
‘వారసుడు, ‘యానిమల్’ చిత్రాలతో అలరించింది రష్మిక. ఇందులో వారుసుడు పెద్ద ప్రభావాన్ని చూపించలేదు కానీ యానిమల్ మాత్రం నేషనల్ వైడ్ గా బ్లాక్ బస్టర్ అయ్యింది. ప్రస్తుతం ‘పుష్ప2’, ‘రెయిన్ బో’, ‘ది గర్ల్ఫ్రెండ్’ చిత్రాలతో బిజీగా వుంది.
ప్రస్తుతం టాలీవుడ్ లో బిజియస్ట్ క్రేజీ హీరోయిన్ శ్రీలీల. ఈ సంవత్సరం భగవంత్ కేసరి, స్కంద, ఎక్స్ట్రా ఆర్డినరీ మేన్, ఆదికేశవ సినిమాలతో ప్రేక్షకుల ముందుకొచ్చింది. అయితే ఆమె హీరోయిన్ గా చేసిన చిత్రాలన్నీ దెబ్బకొట్టాయి. ‘భగవంత్ కేసరి’లో చేసిన పాత్రకు మాత్రం ప్రేక్షకుల నుంచి ఆదరణ లభించింది. రానున్న ఏడాది కూడా శ్రీలీల హంగామా బలంగానే వుంటుంది. ‘ఉస్తాద్ భగత్సింగ్’, ‘గుంటూరు కారం’ తో పాటు విజయ్ దేవరకొండ, నితిన్ చిత్రాల్లో నటిస్తోంది.
సీతారామంతో సీతగా ప్రేక్షకులు గుర్తిండిపోయిన మృణాల్ ఠాకూర్.. ఈ ఏడాది హాయ్ నాన్నతో ప్రేక్షకులని పలకరించింది. ఇందులో యష్ణ పాత్రలో మరోసారి ఆకట్టుకుంది. ఫ్యామిలీ ఎంటర్ టైనర్ గా వచ్చిన ఈ చిత్రం బాక్సాఫీసు వద్ద డీసెంట్ విజయాన్ని నమోదు చేసింది.
సంయుక్త మీనన్ కి కూడా ఈ ఏడాది బాగానే కలిసొచ్చింది. ధనుష్ చేసిన సార్ సినిమా ప్రశంసలు అందుకుంది. విరూపాక్ష సినిమాలో అనుహ్యమైన పాత్రని చేసింది. ఈ సినిమా కూడా బాక్సాఫీసు వద్ద మంచి విజయాన్ని అందుకుంది. ఇందులో ఆమె నటనకు మార్కులు పడ్డాయి. ప్రస్తతం కళ్యాణ్ రామ్ డెవిల్ సినిమాతో ఈ ఏడాదిని ముగించడానికి సిద్ధమౌతోంది. ఈ సినిమా విజయం సాధిస్తే.. ఆమె ఖాతాలో హ్యాట్రిక్ పడినట్లే.
* కొత్త మెరుపులు:
ఈ ఏడాది టాలీవుడ్ కు వచ్చిన కొత్త హీరోయిన్స్ వివరాల్లోకి వెళితే.. అఖిల్ ఏజెంట్, వరుణ్ తేజ్ గాందీవధారి అర్జున చిత్రాలు చేసింది సాక్షి వైద్య. అయితే ఈ రెండూ నిరాశ పరిచాయి. గ్లామరస్ ఆకట్టుకున్నపటికీ సాక్షి నటన మాత్రం పెద్దగా మెప్పించలేకపోయింది. బుట్ట బొమ్మతో అనిఖా సురేంద్రన్ హీరోయిన్ గా మారింది. నటన పరంగా ఆకట్టుకుంది కానీ సినిమా మాత్రం విజయవంతం కాలేదు. అమిగోస్ తో ఆషికా రంగనాథ్, మీటర్ తో అతుల్య రవి, రంగబలి తో యుక్తి తారాజా, నేనూ స్టూడెంట్ సర్ తో అవంతిక దాసాని తెరపై కనిపించారు కానీ విజయం రాలేదు. బేబీ సినిమాతో తెలుగమ్మాయి వైష్ణవి చైతన్య అందరి ద్రుష్టిని ఆకర్షించింది. హీరోయిన్ గా చేసిన తొలి సినిమా ఆమెకు మంచి గుర్తింపు తెచ్చింది.
